По повод одбележувањето на 80-годишниот јубилеј од основањето на Националниот сојуз на слепите на Република Северна Македонија, секретарот на Здружението на слепи лица од Кавадарци упати честитки и порака за единство, солидарност и продолжување на заедничката борба за унапредување на правата и квалитетот на животот на слепите и слабовидните лица.
Во своето обраќање, тој истакна дека овој значаен јубилеј не е само празник на Националниот сојуз, туку и на сите локални здруженија, нивните членови и поддржувачи, кои со децении придонесуваат за остварување на заедничката мисија.
„Осумдесет години не сме само колеги, туку едно големо семејство кое ги споделува истите предизвици, но и заедничките успеси и победи“, беше пораката упатена во име на Здружението од Кавадарци.
Посебен акцент беше ставен на значењето на соработката меѓу локалните здруженија и Националниот сојуз. Како што беше истакнато, здружението од Кавадарци секојдневно работи на подобрување на условите за живот на лицата со оштетен вид, унапредување на локалната пристапност, социјализација и инклузија. Во тие активности, поддршката од Националниот сојуз претставува значаен поттик за истрајност и понатамошен развој.
Од името на здружението беше упатена благодарност до раководството на Националниот сојуз за поддршката и соработката, како и до членовите и сите поддржувачи од локалната заедница кои придонесуваат за остварување на целите на организацијата.
Осврнувајќи се на идните предизвици, претставникот на Здружението од Кавадарци порача дека заедничкото дејствување, солидарноста и истрајноста остануваат клучни за создавање општество во кое секое слепо и слабовидно лице ќе има еднакви можности за активно учество и целосно остварување на своите потенцијали.
На крајот од обраќањето, во име на членовите на Здружението на слепи лица од Кавадарци, беа упатени искрени честитки по повод големиот јубилеј, со желба за уште многу години успешно работење, единство и заеднички успеси.
Осум децении заедништво се темел врз кој продолжува борбата за достоинствен живот, еднакви можности и целосна инклузија на слепите и слабовидните лица.