Со натпреварите одиграни на 31 октомври, успешно заврши Лигата во голбал, која обедини четири екипи од два региона и уште еднаш потврди дека спортот е моќна алатка за промовирање на инклузијата, еднаквоста и тимскиот дух.
Натпреварувањето помина во знакот на спортскиот ентузијазам, борбеноста и фер-плејот, а учесниците приредија динамични и возбудливи натпревари, исполнети со спортски емоции и меѓусебна поддршка.
На лигата учествуваа екипите: „Александар Тодороски“ од Прилеп, „Визија“ од Кавадарци, „Феникс“ од Скопје и „Иднина“ од Свети Николе.
По одиграните натпревари, најмногу успеси забележа екипата „Александар Тодороски“ од Прилеп, освојувајќи го првото место. Второпласирана беше екипата „Визија“ од Кавадарци, третото место ѝ припадна на „Феникс“ од Скопје, додека четвртото место го освои екипата „Иднина“ од Свети Николе.
Покрај екипните успеси, беа доделени и признанија за најуспешните поединци. За најдобар играч на лигата беше прогласен Филип Арсов од екипата „Александар Тодороски“ – Прилеп, додека признанието за најдобар стрелец му припадна на Ибраим Љута од екипата „Визија“ – Кавадарци.
Оваа лига претставуваше многу повеќе од спортско натпреварување. Таа беше можност за афирмација на голбалот, размена на спортски искуства, зајакнување на меѓусебната соработка и поттикнување на активното вклучување на лицата со оштетен вид во спортскиот живот.
Голбалот, како спорт наменет за лица со оштетен вид, со својата динамика и специфични правила, е вистински пример за тоа дека посветеноста, упорноста и заедничкиот дух ги надминуваат сите бариери.
Честитки за победничката екипа, за најуспешните поединци, но и за сите учесници кои со својата борбеност, посветеност и спортски однос придонесоа за успешната реализација на лигата.
Спортот ги поврзува луѓето, ги руши бариерите и отвора можности за нови успеси. Продолжуваме заедно кон нови спортски предизвици и победи!